الأب الغني و الأب الفقير

الأب العني و الأب الفقير  لكاتبه روبيرت كيوساكي من بين الكتب لي قريت شحال هذا، فيه أفكار زوينة مي ميستاحقش كاع ديك القيامة لي نايضة عليه ، أنا تنشوفو بحال شي كتاب ديال ابراهيم الفقي، لا يسمن و لا يغني من جوع، مي فيه أفكار لا بأس بها كيما قلت ؤ غنحاول نهظر عليهم باقتضاب فهاد الموضوع، أول حاجة تتير الإنتباه ديالنا فأي كتاب هو العنوان, أنا أول مرة قريت العنوان : "الأب الفقير و الأب الغني : ما يعلمه لأغنياء لأولادهم بخصوص المال و تغفل عنه الطبقة الوسطى و الفقيرة" قلت مع راسي هذا ميكون غير كتاب تجاري بحال بزاف د الكتب لي تنلقاو فالسوق لي الغرض من كتابتهم هو ربح المال بالأساس ماشي إفادة القارئ.. هادشي لي خلاني منخدوش، مي من بعد قلبت عليه فلانتيرنيت ؤ لقيت الناس عطاتو الشان بزاف!
بزاف ديال الأسئلة جاتني على بالي ديك اللحظة ؤ باش نجاوب عليها كان خاصني نشري الكتاب ؤ نقراه و كذلك فعلت، ؤ هما نفس لأسئلة لي غنحاول نجاوب عليهم هنا: شكون هو روبرت؟ واش بالصح عندو جوج باوات؟ واش بالصح السيد غيعطينا خطوات عملية لي نديرو باش نوليو مرفحين؟ كيفاش ممكن إفيدني داكشي فحياتي أنا كمغربي و لست أمريكي؟....
روبرت كيوساكي Robert Toru Kiyosaki تزاد ف 47 (71 عام) رجل أعمال و كاتب أمريكي، ف 97 كتب الأب الفقير و الأب الغني Rich dad poor dad، فهاد الكتاب روبرت هظر على اهمية المعرفة المالية، الإستقلال المادي، و بناء الثروة من خلال الإستثمار فالأصول (assets) (باقي غنشرح أشناهيا الأسيتس)، ؤ فالعقار، و عمل و امتلاك مشاريع، كمى ركز على تنمية الذكاء المالي من أجل تطوير المشاريع و تنمية الكفاءة المالية. كأغلب الشخصيات لي هضر عليها السوبرمان كان روبرت على بونت ؤ يلوح هاد الكتاب إلى مزبلة التاريخ من بعد ما رفضو شحال من ناشر ؤ شحال من موقع باش احطوه عندهم، مي السيد ممفاكش ناض طبع الكتاب براسو، ؤ دبا راه تباعت فيه كثر من 60 منيول نسخة فالعالم، ؤ تترجم لأكثر من 51 لغة من بينها اللغة العربية.

روبرت كان باه أستاذ جامعي مي وخا هكاك سماه روبرت الأب الفقير، لربما فقير فثقاتو المالية حينتاش الخدمة مع الدولة يييه ممكن تحميك من الفقر مي غتمنعك كذلك من الغنى إلا قتاصرتي عليها. الشخص الآخر لي ستافد منو روبرت فما يتعلق بالثقافة المالية، هو الأب ديال الصديق ديالو ، ؤ هو لي سماه الأب الغني، و لو أنه مكملش قرايتو، إلا أنه مثقف فيها يخص المال و ريادة الأعمال، تا ولا من أغنى الشخصيات فهاواي
روبرت هظر فالكتاب ديالو على 7 د المبادئ علمهم ليه باه المرفح

المبدأى 1 : المرفحين متيخدموش على الفلوس. الناس لي مقودة عليهم تيخدمو باش إجمعو الفلوس، إشريو دار ؤ طوموبيل ؤ يتزوجو...الناس المرفحين تيخدم ؤ تيقلب فين على شي حاجة احدط فيها ديك الحصيصة باش تجيب ليه فلوس خرين
المبدأ 2: الثقافة المالية؛ هنا تيأكد روبرت على واحد الفكرة لي هي ان السر هو ماشي شحال تتشد مي شحال تيبقى ليك من داكشي لي تتشد، ؤ هنا هضر الكاتب على الفرق ما بين الأصولassets ؤ المطلوباتliabilities، لي ممكن نعتروها الفكرة الرئيسية ديال الكتاب، قاليك أودي الفقراء تيخدمو ؤ ديما تيقلبو على ديك الزيادة فالسالير, باش إبنيو أو إشريو شي دويرة، طوموبيلة، تيليفون(liabilities)...ؤ معارفينش بلي داكشي غير خسران الفلوس! واش الدار أو الطوموبيل غيدخل الفلوس لجيبك، بالعكس خياخدو الفلوس لي عندك، أرا نصايبو الصالون لواه الطوموبيل خاسرا... مي الشخص الغني ملي إجمع دوك الفلوس غيحاول إدير أصول (assets) ; غيشري مثلا طاكسي ؤ يكري كريمة، غيشري دار ؤ يكريها...

المبدأ 3: ديها فسوق كرك: متخدمش عند شي قواد تيبني فالثروة ديالو حينتاش متصور منو والو، من غير إلا خدمتي عندو مدة باش تاخد خبرة فداك الدومين، متخدمش عند الدولة...الفقراء تيمنعهوم جوج حوايج من الغنى: الخوف و الطمع، تيطمعو فديك الزيادة، ؤ تيخافو إخرجو من الخدمة، بنادم عزيز عليه الإستقرار المادي لي تيولد واحد الإستقرار نفسي. ديها فسوك كرك، بمعنى إدير غير ولو مشيريع صغير و بقا توسع تا تولي أخنوش.

المبدأ 4: قوة التعاونيات، ماشي ديال الحليب، تيقصد بيها تجمع مجموعة من الشركات لها نفس الأهداف في تعاونية، هكا متيخلصوش بزاف فالضريبة بالمقانة إلا كانت كل شركة تظرب على راسها. من بعد غيدوي روبرت على تنمية الذكاء المالي لي تيقول أنه تيتشكل من 4 ديال الحوايج لي خاصك تتعلمهم باش تسمى ذكي ماليا: 1-المحاسبة 2-الإستثمار 3-فهم السوق 4-القانون
المبدأ 5: الأغنياء يصنعون المال، بمعنى تيقلبو على فرص لتحصيل المال، تيخاطرو ؤ هادي واحد الخطوة ميقدر عيها البوفري، لأغنياء ممكن إخسرو صفقات تا تيولي مفلس و لكن معمرو تيعيابر راسو فقير
المبدأ 6: خدم عند الناس باش تعلم ماشي باش تدير الفلوس
المبدأ 7: تغلب على هاد صعوبات: الخوف، الشك، الكسل، العادات السيئة و الكبرياء