بمناسبة السنة الميلادية الجديدة 2019،(ؤ بالمناسبة سنة سعيدة للجميع) قلت أرا نكتب على واحد الموضوع تيهم بزاف ديال الناس خصوصا هاد الليلة بالذات، ؤ لي هو الشراب، ماء الحياة،، هادي سنين ونا تندشن كل سنة جديدة بالشراب ؤ البيرة، مي هاد العام قررت منشربش لأسباب صحية و اجتماعية..
أولا لابد من الإشارة أن الشراب فعلا عندو منافع و لكن عندو مساوئ كذلك، ثم أن التأثيرات ديال الشراب على الصحة راه تتختلف من شخص لاخر ؤ على حساب نوع الشراب كذلك،،،أشناهو الشراب!! أشناهي المنافع ديال الشراب ؤ أشناهي المساوئ ديالو؟
تنطلقو مصطلح الشراب على أي سائل تيسكر (من السكرة)، مي معمرنا سولنا راسنا علاش الشراب تيسكر!! الشراب أ خاي فيه واحد المادة سميتها الإيثانول، هاد الإيثانول هو لي تيخلي الواحد إسكر، هاد المادة تتنتجها الخميرة (ماشي ديال العجين) لي هي ميكروب تياكل السكر لي كاين فالعنب ولا الكرموس(الشريحة)(بالنسبة للشراب) ولا السكر لي فالذرة (البيرة) ؤ تيحولو للشراب الليحفظ.
دبا ندوزو للسلبيات ديال الشراب:
الشراب عندو تأثيرات على الصحة، مثلا الكبدة لي الدور ديالها (ماشي تحب، الكبيدة قالك ههه) هو تصفي داكشي لي راك تاكل ليكونو فيه شي سموم، ؤ الشراب تيأثر على الكبد خصوصا الناس لي إشربو بزاف ممكن إتصابو بالتليف الكبدي لي هو مرض مزمن تيرون الكبد.
الشراب تيأثر على الدماغ، ؤ هنا غنهظر نيت على كيفاش الشراب تيخلي الواحد سكران! هاديك المادة لي هظرنا علها (الإثانول) تيمصها الدم ؤ تتأثر على الأعصاب لي تتنقل الرسائل العصبية فالجسم ديالنا، تيولي الدماغ متيديرش خدمتو مزيان، تتعطل دوك الرسائل العصبية، هاد الإيثانول بحال شي قحبة تتلقا للفاكتور ؤ تتشدو بالهظرة ؤ متيوصلش البريات فالوقت ؤ ملي تيوصلهم تيخربق داكشي ههه، داكشي علاش الواحد ملي تيكون سكران تتكون هظرتو ثقيلة ؤ تيهترف هههه
وخا هادو كلهم تأثيرات مؤقتة (السكرة)، ولكن الشراب ممكن اسبب أمراض عقلية مزمنة، بحال مثلا إولي الواحد مصطي، تيأدي كذلك لتقلص حجم الدماغ.
الإكتآب، كاينة واحد العلاقة غريبة ما بين الشراب ؤ الإكتآب، الواحد تيسبب لاخر،،.تتلقا الناس لي تيعانيو من الإكتآب تيشربو بزاف باش إنقصو من القلق ؤ يقادو المزاج، يييه الشراب ممكن إخليك تحس بالإرتياح شي سويعات، ولكن الحالة ديالك تتزيد تتأزم من بعد(لأن الشراب من بين مسببات الإكتآب)، ؤ باش تحس مزيان خاصك تشرب عاود، إو تتبقى تدور فهاد الحلقة المفرغة تتموت...
الشراب كذلك تيأثر على الوزن ديال الجسم، الشراب تينقص من الوزن ؤ البيرة تتزيد الوزن، تتلقا داك لي لاباس اعليه مرة مرة إشرب البيرة فالبار ؤ لا تتلقا البيرة مستفة فالثلاجة بلاصط البيض، تتلقى عندو الكرش ؤ صحيح،،ؤ داك البوفري المزلوط لتيرونها فالزنقة حينتاش شارب، تتلقاه رقيق حينتاش هو متيشربش البيرة، هو تيقلب على السكر التام هههه البيرة متشد فيه وخا إشرب 10، ؤ داك الزمر غالي، اللهم إطرو ديال الروج ورا برع...
الشراب تيأثر على القلب، لي إشرب شويا مرة مرة راه إصلاح للقلب، الشراب تيزيد من الكوليستيرول المفيد فالدم، تينقص من ضغط الدم، تينقص من مادة الفيبرينوجين لي تتسبب جلطات الدم، تينقص من القلق لفترة محددة، مزيا ولكن ملي الواحد تيطيح فالإدمان ؤ تيولي إشرب بزاف هنا نسبة إصابة الشخص بشي مرض قلبي تتزاد..
السكري، الشراب ممكن إتسبب فمرض السكري إلا الواحد تيشرب بزاف مي الواحد لي متيشربش بزاف راه خطورة الإصابة بالسكري تتنقص عندو
السرطان، هاد المرض الخطير لي السبب ديالو هو نمو غير طبيعي للخلايا،،،هنا الشراب ممكن إسبب سرطان الفم، الحنجرة، المصران، البزول ؤ الكبدة...على حساب دراسة تدارت، الإستهلاك ديال الشراب، ولو غير شويا، مثلا كاس كل يوم، تيزيد من خطر الإصابة بسرطان الفم و الحنجرة بنسبة 20%..
الشراب عندو تأثير على الجنين، الا شي مرة حاملة ؤ تتشرب، هنا احتمال إتزاد الجنين بعيوب خلقية لا فما يتعلق بالتطور ؤ النمو ديالو، الذكاء، ؤ الأفعال ديالو، بحال لقلتي الدري تيتزاد سكران ؤ تيبقى سكران طول حياته،،
خطر الموت، لربما مغتيقش أن العلم لقى بلي الشراب تيطول فالعمر إلا تيشرب الواحد حدو قدو ، و لكن دراسات اجتماعية بينات بلي الشراب تيأدي لأمراض تتبان على مدة..الشراب تيأدي لمشاكل اجتماعية، تيسبب فحوادث مميتة..نهيك عن خطر الإدمان لي تيخلي الواحد مدمن على تأثير الكحول ؤ داكشي لي تيخلي الواحد عايش بالشراب متيقدرش إحبس، ؤ هنا كاع الإجابيات ديال الشراب تتبخر هباءا منثورا..
و لذلك قال الله عز وجل في كتابة الكريم : (يَسْأَلُونَكَ عَنِ الْخَمْرِ وَالْمَيْسِرِ ۖ قُلْ فِيهِمَا إِثْمٌ كَبِيرٌ وَمَنَافِعُ لِلنَّاسِ وَإِثْمُهُمَا أَكْبَرُ مِن نَّفْعِهِمَا ۗ )
#Moroccan_Superman
Facebook : السوپرمان المغربي
Fb page : السوبرمان المغربي
No comments:
Post a Comment