فنزويلا: ميليونيرات فقراء

نتيجة للتضخم المهول لي عرفاتو فينزولا، ولا الواحد إشري ورق المرحاض ب 2،600،000 (جوج منيول ؤ ستين ألف) بوليفارز فنزويلي، ؤ هاد العجب كامل يلاه ثلاثة دراهم مغربية ؤ شي ريالات صفرين. ؤ باش إخرجو من هاد المشكل ناضو أ سيدي حيدو خمسة ديال الأصفار من العملة ديالهم .. مي كيف طرا وجرا تا طاحت هاد البلد ،الأكثر تحضرا فأمريكا الجنوبية، فهاد الخرا؟ ؤ كيفاش زعما حيدات خمسة دالأصفار من العملة ديالها؟

فنزولا هي واحد الدولة جمهورية كاينة فأمريكا الجنوبية، كانت واحدة من مستعمرات اسبانيا، ؤ أغلب السكان يتحدثون اللغة الإسبانية ؤ هي لغة رسمية فالبلد..

هادي ربع سنين ؤ فنزولا تعاني من بوهراس اقتصادي حينتاش واحد من المنتوجات لي تيدخل اللعاقة للبلاد نقص فالثمان سنة 2004، تنهضر هنا على النفط لي تيشكل 96% من مداخيل الدولة. هادشي لي خلا البلد أطيح فواحد التضخم مهول (كاينين أنواع مختلفة من التضخم، هذا لي وقع ففنزويلا كان السبب ديالو هو كثرة الفلوس ؤ قلت السلعة، البلد مبقاش إستورد من برا حينتاش حازق، ؤ السلعة المحلية طلعات فالثمن، وا ولات قبصة د القزبر ب منيول أ الزمر)
هاد التضخم متوقع أنه إوصل ل مليون فالمية على حسب ماقال صندوق النقد الدولي، كثر من منيول شخص خوا البلاد، نقصت الماكلة ؤ الدوا، تزادت نسبة الفقر.. تقول لشي حد أجي خدم معايا نعطيك عشرة دلمنيول إقول ليك زيدها فكرك يعني الأجور مبقاتش عندها قيمة، الفلوس مبقاتش عندهم قيمة!

كيفاش زعما حيدو 5 أصفار!! بحال لقلتي مليون غتولي 10 دراهم، يعني بدلو غالفلوس ؤ صافي، طبعو فلوس جديدة (سمية العملة الجديدة: البوليفار السيادي، هادي شي 4 شهور باش طلقوها..ربطوها بعملة إلكترونية بحال البتكين سميتها بترو غير ؤكان هاد بترو مشكوك في أمرها) حينتاش مول الحانوت تيتشكا قالهم معندي فين نخزن هاد الزبل، عمرات ليه الحانوت بالفلوس لي معندها قيمة . هادي ماش أول مرة تدير فنزويلا هاد البلان، فايت حيدات تلاتة ديال الأصفار من العملة ديالها إبان الأزمة الإقتصادية سنة 2008..هاد النقصان فالأصفار بحال شي واحد تيخرا ؤ تيلعب بخريتو، يعني لا يسمن و لا يغني من جوع، إلا مدارو معاه شي إصلاحات اقتصادية حقيقية.

و في الزيمبابوي إسوة حسنة!! راه ماشي فنزويلا هي السباقة لهاد الإنجاز، نفس البلان طرا للزيمبابوي ف 2008، هما وصل التضخم عندهم ل 2 منيول فالمية، ناضو حيدو ماشي 5 أصفار بل 10 أصفار، تولي زرقالاف ديالهم تتسوى مليار دولار زيمبابوي..بطبيعة الحال دوك التخاور ديال تحيد الأصفار مخدماتش، تا ولا الدولار بحال وراق الإنتخابات عندنا، الزمر مشتت فالشوارع.ؤ ولاو الناس إتعاملو بالدولار الأمريكي، الأورو، ولا الراند الجنوب إفريقي، زيمبابوي متكساب بوها عملة لحد الآن.

#المهرطق