السترات الصفراء: خلف الكواليس

Paris Demonstrations, Wikimedia

 

حركة السترات الصفراء هي حركة احتجاجات شعبية كيما تنعرفو ؤ لي بانت أولا فلافرونس منذ شهر ماي ؤ زادت قودات فنونبر تا ولات من اعنف الإحتجاجات لي عرفتها فرنسا منذ 1968..هاد المظاهرات تسببات فيها مجموعة من العوامل لي من بينها ارتفاع الثمن ديال المازوط، المعيشة غلات، الحكومة زادت فالضارئب...وخا هادشي كل تنعرفوه مي علاش الحكومة غتزيد على المازوط ؤ تزيد فالضرائب فهاذ الوقت؟ كيفاش بداو هاد المظاهرات؟ علاش الجيليات صفرين ماشي الجلالب؟ أشناهو موقف الزماكرية المغاربة من هاد الإحتجاجات؟ كيفاش نتقلات من فرنسا إلى والونيا الألمانية ثم بلجيكا ...؟ 
هادو أسئلة و أخرى غنهضرو عليهم فهاد لارتيكل إنشاء الله.

أولا نهظرو على كيفاش بداو هاد المظاهرات من بعد ندوزو لخلف الكواليس، هادي واحد المرأة فرنسية دارت واحد العريضة تترفض فيها هاد الزيادات لي دارت الحكومة الفرنسية خاصة فما يخص المحروقات، العريضة دارتها فموقع change.org فشهر ماي 2018 ؤ من بعد غتوصل ل 300000 توقيع فشهر أكتوبر، ناض واحد خونا دار واحد الدعوة فالفيسبوك للخروج للشوارع و قطع الطرقات ف 17 نونبر...الناس تتناقش فديك الإيفانت ؤ قتارح عليهم واحد خونا الجيليات صفرين، علاش الجيليات صفرين؟ حينتاش هي رمز للحركة و البروز(برز يبرز بمعنى ظهر ماشي البراز)، كيف ذلك، من سنة 2008 ؤ الحكومة الفرنسية دارت واحد القانون تيلزم كل شخص تيصوك الموطور ولا الطوموبيل اكون عندو داك الجيلي باش إبان للناس الخرين إلا خرج من طوموبيلتو و لا ؤ هو صايك موطورو...لذلك هاد الجليات كانو متوفرين فيما مشيتي فلافرونس، كانو رخاص ثم باينين..(كنت بغيت ندير شي مشيريع نصدر هاد الجليات لفرنسا مي قالو لي معطا الله غير هما، موفيز أفير) هنا تيبان لينا عاود ثاني الدور الكبير للأنترنت و وسائل التواصل الإجتماعي بصفة عامة و الفييسبوك بصفة خاصة فتغيير مصير الشعوب..كم أنت عظيم أيها السوبرمان مارك زوكربورك.

لربما أن هاد الإحتجاجات فعلا تدارت على قبل دوك الزيادات، و لكن إلا قلبنا على السبب وراء دوك الزيادات غنلقاو بلي الرئيس عطا واحد السبب لي هو الحفاظ على البيئة بحال ديك الحفاظ على الطاقة لي قال العثماني ملي زادو ساعة، و لكن من بين الأسباب الرئيسية هو ترامب!! ناض ترامب مؤخرا فرض على أعضاء الناتو ،لي هو اختصار للحلف الشمال أطلسي (تدار سنة 1949 تيفرض على أعضاء هاد الحلف إتعاونو بيناتهم إلا تعرضت شي دولة لهجوم من طرف دولة خارج الحلف، الحلف تيضم 29 دولة، المغرب مكاينش فالحلف، لكنه حليف رئيسي خارج الناتو، ضمناتو ميريكان سنة 2004 من قبل جورج بوش)، فرض عليهم إزيدو الإنفاق ديالهم فالحلف الأطلسي، قالهم يا تلتزمو بنسبة 2% من اجمالي الناتج المحلي ولا ندير الحلف ديالنا لراسنا ؤ ميركان معمرها تحمي ديلمكوم، مع العلم أن ميريكان تتوصل 3،5 (22% من مصاريف الحلف)من نسبة الإنفاق من اجمالي الناتج المحلي بينما فرنسا يلاه 1,23% (10% من مصاريف الحلف)، ؤ فعلا راه ميريكان هي المساهم الأكبر فهاد الحلف منذ تأسيسه بنسبة 71% ، ؤ تتبقا ديك 29% تتقاسمها ديك 28 دولة لي بقات!!
ممكن نشوفو هادشي على أنه لعبة سياسية، نظرا للزكير مابين ماكرو ؤ ترامب، بخصوص ملفات دولية، بحال تعاون فرنسا مع إيران، بطبيعة الحال ليس لسواد أعينها، بعد انسحاب ترامب من الإتفاق النووي. ثم مواجهة الدول الأوروبية وخاصة فرنسا لترامب بخصوص تعديله للرسوم الجمركية لمصلحة بلده..
روسيا كذلك عندها أهذاف تخليها تساهم فهاد المظاهرات ؤ لي من بينها إظعاف الاتحاد الأوروبي من خلال إضعاف قائدهم فرنسا، باش متكونش عندو ديك الفعالية فالملفات الدولية لي تتخص روسيا بحال ملف روسيا مع أوكرانيا،، ثم أن خلق هاد المشكلة الإقتصادية و السياسية ممكن إخلي فرنسا تلتاجأ لروسيا باش تعاونها خصوصا وأن العلاقة مابين فرنسا ؤ ميريكان فهاد الظرفية ماشي تالهير.