أغنى شخص فالتاريخ الحديث !!

لطالما تنتسائلو على اغنى شخص فالعالم، مي تنشوف بلي تحديد هاد الشخص غيكون صعيب إلى حد بعيد. حينتاش أولا الثروة تتزاد ؤ تتنقص، ثانيا ماشي أي واحد غتعرف شحال عندو، إلا خدينا المجلة العالمية فوربس تتصرح مثلا أن محماد السادس عندو شي 5.7 بليون ، ماشي منيول، بليون دولار أمريكي، هادشي لي تيوضع الملك فالرثبة الخامسة إفريقيا من حيث الثروة ؤ الأول فاللائحة هو النيجيري أليكو دانكوت (12.2 بليون دولار أمريكي) رجل أعمال فمواد البناء، مي شكون قاليق ياك ما هو غير خدام عند محماد السادس مقابل ليه المشاريع فلافريك، فوربس كاع مساقت الخبار بلي محمد السادس فعلاقة معقدة compliquée, دايرين ليه فالبروفايل متزوج، خلي عليك إجيبو الخبار على الثروة ديالو! هاد الناس متقشبل منهم فوربس والو ههه
دبا خلينا من هادشي كامل، شكون هوا أغنى رجل فالعالم؟ شحال عندو؟ آش تيخدم؟
هادو أسئلة و أخرى غنحاول نجاوب عليهم فهاد الموضوع

حسب فوربس دائما، جيف بيزوس هو أغنى رجل فالعالم. سميتو جيفري بريستون بيزوس تزاد ف 64 (تكون عندو 54 عام دبا) ، هو منظم تيكنولوجيا (رجل أعمال فمجال التيكنولوجيا) أمريكي، مستثمر و فيلانتروبيست بمعنى السيد تيدير الخير، نفس الحاجة قلناها بخصوص وارن بافيت و رالف لورن، 'الكفار' تيصدقو البلاين!! جيف هو المؤسس ؤ الرئيس التنفيدي ديال الموقع التجاري الغني عن التعريف أمازون Amazon. 

بيزوس تخرج من جامعة برانسيتون ف 86 فمجال الهندسة الكهربائية و المعلوميات، من بعد خدم فوول ستريت (ماشي البورصة غا داك الشارع لي فيه البورصة) فبريكولات لها علاقة بمجال التخصص ديالو تال 94، تماك غيصاوب أمازون لي كان فالأول سماه كادابرا ، هاد الموقع لي بدا فالأول ببيع الكتب و فقط، السيد هو لي تيتكلف باش إغلف الكتاب فواحد الكراج عندو ؤ يصيفتو للكليان ؤ شي مرات تيدير الدروب شيبين حينتاش الكراج عندو صغير ؤ ميهز ليه بزاف دبال السلعة.. ؤ خاصك تعرف بلي السيد ما دخل تا ربح تال 2001 يعني 6 سنين من بعد ما صايب أمازون، نتا تدير مشيريع دبا، فالعشية تشكا تقول مدخلت والو..الناس كافحت فالأول؛ تا من البيروات باش إخدمو صاوبوهم من بيبان قدام..من بعد بدا الموقع تيتوسع حتى شمل كاع البضائع القانونية (أما الغير قانونية راه خلاها للبزنازة فالدارك ويب،أجي ميكونش عندو شي موقع تجاري فالدارك ويب زعما!!)
ؤ الأمازون راه ولا أكبر شركة مبيعات على الويب فوقتنا الحالي. بالإظافة إلى هاد المشروع جيف عندو اهتمام بالفضاء داكشي علاش دار جوج شركات تتهتم بهندسة الطيران و الفضاء الجوي هما بلو ؤوريجين و أيروسبيس من بين الحوايج لي تيخدم عليها جيف فهاد الشركتين هو صناعة صاروخ بحال شي طاكسي إوصل الناس للفضاء ؤ يرجعهوم. فسنة 2013 السيد شرا جريدة واشنطون بوسط ب 250 منيول دولار أمريكي..
بالضبط من تاريخ 27 يوليوز 2017 أصبح جيفري أغنى رجل فالعالم بثروة تقدر ب 90 بليون دولار أمريكي، بحال لا قلتي تمنطاش ديال محماد السادس، يالا الروعة! اللهم بارك الثروة ديالو بقات تتزاد، فات 100 بليون دولار أمريكي ف 24 نونبر 2017، ؤ عتابرتو فوربس أغنى رجل فالعالم ف 6 مارس 2018 بثروة تقدر ب 112 بليون دولار أمريكي، ؤ ف يوليوز 2018 غطلع الحصيصة ل 150 بليون دولار أمريكي (أول شخص عندو كثر من 100 بليون تيتسجل ففوربس، داكشي علاش سماوه أغنى شخص فالتاريخ الحديث). غا مؤخرا ف شتنبر 2018 جيف علن على يوم بيزوس للعطاء، ؤ لي تصدق فيه ب 2 بليون دولار أمريكي باش إعاون العائلات المتشردة ؤ يخلق مدارس أولية للأطفال فميريكان.

 بهاذا غنكون ساليت هاد الموضوع لي هظرنا فيه على السوبرمان جيف بيزوس مؤسس شركة أمازون و السلام.إلا بغيتو نهظر على شخصية تهمكم خليو ليا كومونطير