فييسبوك: أنت المقابل

من 2010 ؤ فيسبوك تتسمح للمستعملين ديالو إتيليشارجيو واحد الدوسي فيه كاع داكشي لي دوزتي معاهم، أي حاجة تتشوفها مهمة ولا تافهة تتشجل، تامن وقت الدخول و الخروج من الفييس!! ؤ باش تتيليشارجي هاد الدوسي راه ساهل بحال شريب الما، مي العجب لي تلقا فيه إخليك تعرف بلي الفييسبوك ماشي مجاني راك نتا هو المقابل!!!

رغبة مني باش نعرف أشنو تتستفد الشركة العملاقة فييسبوك من ناس بحالنا إضلو إتسركلو فالفيس لا بيع لا شرا..قررت نتيليشارجي ملف المعلومات ديالي، ؤ كان الغرض ديالي نعرف علاآش تيركز هاد الحظ ديال المعلومات ؤ آش ممكن استافدو من داكشي.

اولا حاجة لاحطها هي العجب ديال المعلومات لي صرحت بهم لفييسبوك ؤ بلا منعيق، اي حاجة صغيرة ولا كبيرة دخلتها للفييس كان إشدها ولد الكلبة شدة العمى فالظلمة، لقيت تصاوري لي تمسحو من ذاكرتي و الفييس منساهمش، لقيت المنشورات ديالي، الميساجات، النكزات pokes, الفيديوات، ليكومونطير، أحداث، تسافيرات، مناسبات....
بزاف ديال المعلومات لي خاصك ليهم ساعات ؤ ساعات باش تطالع عليهم كاملين، وي بزاف ديال المعلومات تيبانو عاديين مي وحدين خرين راه تيفاجؤوك.
بكل بساطة الفييسبوك متيمسح تا حاجة، أصدقاء حيتيهم من لا ليست، العلاقات لي دازت، الخديمات لي دوزتي، السميات لي كنتي درتي...

أنا كنت حليت الكونط ديالي اللول ف 17 أكتوبر 2007 مع 15:23 ديال العشية، ؤ كاع داكشي لي دوزت من داك النهار عطاه ليا المسخوط فدوسي فيه 500mb , حسيت و لأول مرة فحياتي بلي 12 عام من الحياة ديال واحد الشخص تسجلات بدقة ؤ تخزنات ؤ تيتم التحليل ديالها..
تصور ان الفييس فكرني فجميع البورطابلات لي دازو عندي؛ كاينين تصاور لحتهم للفييس سنوات مضت، مسحت التصاور، نسيتهم، مي هو منساش، ؤ ماشي غير التصاور، تا النوع ديال التيليفون و لا الكاميرا باش صورتها، ؤ الريكلاجات ديالها، ؤ الآي بي لي نشرت منو ديك التصويرة!!
كيفما سبق ؤ دكرت بلي الفييس تيسجل كذلك دايما إمتا دخلتي ؤيمتا خرجتي منو، إذن إلا نتا بحالي من دوك البليون ؤ نص لي تيستعملو الفييس دايما، فراه تيعرفو (من خلال تحليل معطياتك طبعا) حياتك الشخصية اليومية، الدار ديالك، عنوان العمل، التنقلات ديالك، وقت النوم، وقت الاستيقاظ، التسيفرات ؤ المدة ؤ الوجهة ديالك...

الفيسبوك كذلك تيعرف كمارتك مزيان، فالدوسي لي عطاوني، ولاد الناس عندهم كثر من 300 مثال على الملامح ديالي، ها أنا ضاحك ولا كاعي، التصويرة مظلمة ولا منورة، فاص ولا الجنب....باش البروكرام معمرو إغلط باش إلقاني..الفييسبوك كان قال بلي إمكن ليهم إحددو الوجه ديال الشخص بدقة تفوق 98%، ؤ ممكن إلقاو وجهك من بين 800 منيول تصويرة فقل من خمس ثواني 1-2-3-4-5
الحاجة الخرى لي لقيت فهاد الدوسي هو النماري ديال لي كونطاكت ديالي كلشي مسجل، ملي تتعطي الإذن لفييسبوك باش إدخل للنماري ديالك راه تياخد كلشي ؤ تيسجلو عندو.
العجيب فهاد الحزاق أنه تيوريك تا المعلنين (مالين الإشهار) لي تباعت ليهم المعلومات ديالك، باش إستاغلو داكشي فتسويق المنتوجات ديالهم، ؤ هكذا تيربح مارك على ظهرك...أنا شي 23 شركة تباعو ليها المعلومات ديالي، من بينهم، أمازون، إيبي، سبوتيفاي، جوميا، أنغامي...
كنت نقول ماشي مشكل إبيعو المعلومات ديالي ؤ لا يضبرو راسهم، المهم أنا تنستافد من واحد الخدمة رائعة ؤ فابور...مي أخيرا لقيت بلي الخطر كاين فجوج حوايج: النوايا ديال ديك الشركة لي غتشري المعلومات ديالي، ؤ وسائل العمل ديالها، لي من خلالهم غتشكل عليا واحد الضغط تنظيمي ؤ نبقا ندير داكشي لي بغاو بلا منعيق..
بلوكيت الكونط ديالي، ونا نكون مجهول، السوبرمان.
باش تيليشارجي الدوسي ديالك، دخل للريكلاج (إعدادات،settings) ثم ادخل الى معلوماتك على فيسبوك (your facebook information) ثم اضغط على حمل معلوماتك (download your information)