فالموضوع الأول كنا هظرنا على الانترنت الخفي و كنت قلت ليكم بلي الأنترنت الخفي ماشي هو الأنترنت المظلم كما يعتقد البعض، الانترنت المظلم أو الدارك ويب هو أعمق مكان فالويب و أصغرهم كذلك بالمقارنة مع الأنترنت السطحي و الانترنت الخفي لي تيشكل النسبة العظمى (أكثر من 90%).
الانترنت المظلم بحالو بحال الأنترنت الخفي؛ تا هو ممسجلش (بمعنى ميمكنش تلقاه بإستعمال محركاة البحث العادية) و لكن هو سميناه الأنترنت المظلم حينتاش داكشي لي فيه غير قانوني و نادر.
توظيح لابد منه:
الأنترنت المظلم هو جزء من الأنترنت الخفي، أي محتوى كاين فالأنترنت المظلم راه ؤوتوماتيكمون تيندرج ضمن الأنترنت الخفي و العكس خطأ؛ أي محتوى كاين فالأنترنت الخفي ماشي بالضرورة تيندرج ضمن الأنترنت المظلم.
مي كيفاش ممكن ندخل للأنترنت المظلم؟ آش ممكن نلقا تماك؟
باش ندخلو للأنترنت المظلم تيخصنا متصفح خاص سميتو طور Tor, هاد طور هذا تيمكن المستعملين ديالو من أنهم إبقاو أنانيموس يعني مجهولين الى حد بعيد؛ عنوان الآيبي ديالك، الأنشطة ديالك، المعاملات...كلشي تيبقى سري و مجهول.
آش إكون هاد طور؟شكون صايبو؟ؤ علاش؟
هاد طور Tor أ خويا هو اختصار ل The Onion Router ؤ هو بكل بساطة برنامج تخفي على شبكة الأنترنت، إمكن نقولو هو النسخة الخفية ديال google مثلا، بجوج بهم تنديرو بهم البحث فقط طور تيخليك تكون مجهول الهوية. هاد البرنامج خدمو عليه خبراء فالأبحاث البحرية الأمريكية سنة 1990، ؤ ثم تطوير البرنامج بعد ذلك، باش أنهم إحميو مجتمع الإسخبارات الأمريكية على الويب.
طور هو متصفح مجاني، ممكن أي واحد فينا إتيليشارجيه، هو مجهول، ؤ مفتوح المصدر تيسيروه ناس متطوعين عبر بقاع العالم، اسماء النطاق فطور ماشي بحال المتصفحات العادية لي تتسلي ب .com .org .ma ؤ لي ممكن إتعقبها الهاكرز بسهولة، بل هي تتسالي ب .onion ؤ لي مككن تدخل ليها فقط باستعمال برنامج تيقرا الأونين بحال طور.
ن.ب ماشي gاع المواقع لي كاينين فالأنترنت المظلم هي مواقع غير قانونية، بل كاينين مواقع لي هي قانونية و تقدم خدمات جيدة و قانونية.
(إلا بغيتوني نهظر ليكم على الطريقة السليمة لتصفح الأنترنت المظلم فمرحبا، معليكم إلا تخليو كومونطير هنا ؤ لا فالفييس)
آش ممكن نلقا فالأنترنت المظلم؟!؟! كلشي بالمعنى الحرفي ديالها،ؤ هادي تجربة شخصية،
الأنترنت المظلم بحالو بحال السوق السوداء لي كاينة فالواقع ؤ لي ممكن نشريو منها سلع و خدمات لا يتصورها العقل، غير الفرق أن هذاك موجود فالأنترنت؛ معطا الله فالدارك ويب غير الأسواق بحال الإيبي و الأمازون، فين تلقا أي حاجة تقدر تجي على بالك ؤ تقدر متصورهاش كاع بحال مثلا:
مختلف أنواع المخدرات
الأسلحة
برامج مقرصنة
بطائق بنكية مسروقة و كذلك معلومات بنكية
وثائق مزورة بحال الباسبور ؤ الفيزا، أهيا عندك تمشي تشري شي فيزا ديال لافرونس ؤلا لاميريك ؤ تصدق مشدود ؤ تسبها فالسوبرمان، أنا بارئ منك
خدمات القرصنة
خدمات الهيتمان يعني القناص و المرتزقات، القتلة المأجورين
بالإظافة إلى هادشي، كاين ما كفس، ؤ هادشي علاش منصحكش تدخل للدارك ويب، راه نوريك الإحتياطات لي تدير باش تحمي الحاسوب ديالك و لكن ميمكنش نعطيك شي ؤونتي فيروس لدماغك ؤ هاد المشكل وقعت فيه شخصيا، النفسية ديالك تتدمر؛ تتلقا تماك البورنو ديال الدراري الصغار، قل من 10 سنين ؤلا باقين تيرضعو، تيعدبوهم، تيغتاصبوهم....ؤ كاينين الغرف الحمراء، هادو تيبينو فيها شي شخص تيعدبوه، إغتاصبوه، تيقطعو لأطراف ديالو، فاللخر تيقتلوه.. باش تفرج فهادو تتخلص ؤ تتفرج على المباشر بل ؤ تتقترح عليهم نوع التعديب لي بغيتي إطبقوه،،،
ؤ كاينة واحد النوع آخر ديال التعديب؛ تيجيبو ق**ة تتسب شي حيوان صغير بحال المش مثلا من بعد تتعفس عليه بالتالون ؤ تتقتلو....إلى آخره من الأعمال الشيطانية الخبيثة...ؤ تتلقا هاد المواقع عندها ألاف الرواد من الأشخاص البيدوفيليين المرضى نفسيا. ؤ الخلاص فالدارك ويب تيتم عن طريق العملة الرقمية البيت كوين، ؤ هاذا موضوع آخر الا بغيتوني نهضر عليه خليو كومونتير. و السلام.
No comments:
Post a Comment