البِتْ كُيْنْ: المستقبل الموعود أم الطريق المسدود 1

فسنة 2009 و لأول مرة بانت واحد العملة ماشي بحال كاع العملات لي تنعرفو! تعرفو عيها المغاربة فالآونة الأخيرة ؤ الأغلبية نطقاتها بشكل خاطئ، قالك البيتكوين أودي راه سميتو بِتْ كُيْنْ ماشي بِتْكْوِنْ. معليناش بِتْ كُيْنْ تيعني بزاف ديال الحوايج لبزاف ديال الأشخاص، البعض تيشوف بلي بِتْ كُيْنْ هو مستقبل نقل العملة بدون قيود الأبناك، شي وحدين قاليك بِتْ كُيْنْ ما هو إلا كيان رقمي لي عندو واحد القيمة مشكوك فيها ؤ ولد الحرام يعني الأصل ديالو ممعروفش. مي أشناهو البيتكوين حقيقة بعيدا عن آراء الناس؟ شكون صايبو؟ ؤ علاش؟ باش تيتميز على العملة العادية؟ واش تاهو خاص بدولة وحدة بحال الدرهم المغربي مثلا؟؟؟

بِتْ كُيْنْ أعزائي الكرام اعزاأتي الكرامات هو عملة رقمية مشفرة (cryptocurrency) ؤ هادي واحد الحاجة تيعرفها الجميع و لكن الأمر أعقد، من العقدة، من ذلك. بِتْ كُيْنْ جوج حوايج مترابطين ؤ معقدين بزاف!

بِتْ كُيْنْ كيما قلت تعرف عليه العالم سنة 2009، ملي واحد الشخص (أو مجموعة من الأشخاص) سميتو ساتوشي نكموتو Satoshi Nakamoto دار واحد الموقع لي دار فيه هاد العملة الرقمية بِتْ كُيْنْ ؤ شرح كيفاش تتخدم.

هادوك جوج حوايج لي قلت ليكم هما بِتْ كُيْنْ و البلوك تشيت (سلسلة الكتل)Blockchain. غنشرح أولا اشناهو البلوك تشين ؤ لي هو الاساس ديال بِتْ كُيْنْ ، بمعنى بلا بلوك تشين ميكونش بِتْ كُيْنْ. أول حاجة لازم نشير ليها هي أن البلوك تشين راه ماشي هي بِتْ كُيْنْ كيما تيعتقد البعض. بِتْ كُيْنْ راه غير عملة ؤ واحد النظام ديال الدفع بحال الدولار ؤ الفرق الأساسي لي كاين بيناتهم هو أن بِتْ كُيْنْ رقمي ؤ معندوش وجود فزيائي، كما تجدر الإشارة إلى أنه كاينين عملات رقمية أخرى (بحال: لايت كوين، ريبل، إثيريوم...) غير بِتْ كُيْنْ هو المعروف بزاف حينتاش هو لي بان اللول.
البلوك تشين هي اختراع تكنولوجي تيمكنا من نقل العملة الرقمية من شخص لآخر. البلوك تشين تتحاول تحل واحد المشكل لي هو تحويل الأموال, لنفترض أن الشخص x من ميريكان باغي إصيفط الفلوس للشخص y فالمغرب، هنا تيخصنا واحد الطرف ثالث موثوق المهمة ديالو بحال شي وسيط تيحدد الشخص y كحساب بنكي من بعد تتم عملية التحويل فيومين على الأقل، ؤ هاد الطرف الثالث هو البنكة، ؤ البنكة بطبيعة الحال تيدير ديك الخدمة بمقابل. جات البلوك تشين حيدات داك الطرف الثالث، حيدات الابناك، ؤ حيدات معها الرقابة لي تتمرسها الدولة على المواطنين من خلال الأبناك، كذلك خفضات تكاليف التحويل بشكل كبير، و نقصات من الوقت لي تيستغرقو التحويل بل ؤرداتو آني فالبلاصة.

مي كيفاش قدرات البلوك تشين تستغني على خدمة الأبناك؟ من خلال جوج حوايج لا ثالث لهن
أولا تتخدم بما يسمى على حد ترجمتي المتواضعة دفتر الحسابات المفتوح (open ledger). غنحاول نشرح هاد العملية من خلال واحد المثال، 
 نفتارضو أننا عندنا ربعا دالناس : أ، ب، ت، ج ، الشخص أ عندو 50 درهم، صيفط منها 25 درهم للشخص ب، الشخص ب صيفط 20 درهم للشخص ت، ؤ الشخص ت صيفط 10 دراهم للشخص ج. هاد التحويلات تيتسجلو فواحد السيستيم لي هو دفتر الحسابات المفتوح، ؤ تنعتابرو هادي واحد السلسلة ديال التتبع باش نعرفو فين كانو الفلوس ؤ فين ولاو، ؤ هادشي علاش البلوك تشين تسمات بذلك الإسم (سلسلة الكتلة) حينتاش فيها بزاف ديال السلاسل ديال التحويلات. ؤ هاد التحويلات هي من بين المعلومات العامة لي أي واحد تيخدم فالشبكة إمكن إطالع عليهم و كدى الرصيد لي تيمتلكو كل شخص من عملة البيتكوين. بمعنى إلا خدينا شخص آخر ح مثلا ولو أنه مدخلش مع الخرين فدوك التحويلات إلا أنه تيعرف أشنو طرا تماك ؤ تيعرف كل واحد شحال عندو فالصولد.

و منه أي واحد تيمكن ليه إعرف كذلك واش داك التحويل ديال العملة ممكن ولا لا، مثلا لنفترض أن الشخص أ ناض من بعد دوك التحويلات لي وقعات صافط للشخص ج 30 درهم، هنا كل واحد فالشبكة غيبان ليه بلي هداك الشخص مخروض حينتاش عندو غير فالصولد 25 درهم و منه مغاديش إصادقو على عملية التحويل.

نتمنى نكونو تال دبا متفاهمين، حينتاش هذا موضوع معقد شويا، ؤ باقي فيه ميتقال.. تنعرفو أن الأبناك كأغلب المؤسسات فيها موظفين، إوا كيفاش القضية ديال هاد بِتْ كُيْنْ! شكون تيصادق على التحويلات ديال العملة؟ بأي مقابل؟ شنو لي تيتحكم فالصعود و النزول ديال بِتْ كُيْنْ؟ شكون هوا ساتوشي ناكاموتو؟
هادو أسئلة و أخرى غنحاولو نجاوبو عليهم فالموضوع القادم إنشاء الله... 

Moroccan_Superman#

image taken from : wccftech