البِتْ كُيْنْ: المستقبل الموعود أم الطريق المسدود 2

خوتي السُّوپِّرمَنْ، خواتاتي السُّوپِّروِمْنْ. فالموضوع الأول كنا هضرنا على أول ظهور للبيتكوين ؤ الساس ديالو لي هي البلوك تشين من بعد دوينا على واحد الحاجة تتميز بها البلوك تشين ؤ لي هو دفتر الحسابات المفتوح، إلى باقي مقريتيش الموضوع اللول سير قراه من هنا.
كتتمة للموضوع الأول غنهظرو فهاد المقال أولا على الحاجة الثانية لي تتميز البلوك تشين، ؤ لي هي دفتر الحسابات المفتوح و الموزع؛ واحد الحاجة تتحاربها البلوك تشين هو الإحتكار خلاها ناصر (اللامركزية)، شفنا أن البلوك تشين ما هي إلا سلسلة من تحويلات العملة الرقمية(هاد التحويلات لي تنهظر عليهم من الصباح راه ممكن تكون عملية شراء البيتكوين، المتاجرة بالعملة، التعدين، بيع منتجات مقابل البيتكوين كأغلب المواقع فالإنترنت المظلم مثلا...) مي كيفاش تيتوزعو دوك التحويلات فالشبكة باش كل واحد إسيق ليها الخبار؟ ؤ شكون تيقوم بديك المهمة ديال المصادقة على أي تحويل؟ كيفاش؟ ؤ علاش؟...
كالعادة غنحاول نشرح هاد لخاصية الثانية (التوزيع) من خلال واحد المثال مبسط؛ نفتارضو أن الشخص (ب) بغا إصيفط 5 دراهم للشخص (ج)

أشنو تيدير الشخص (ب)، ينشر هاد عملية التحويل فالشبكة و منه كل واحد فالشبكة تيمكن ليه إشوف ديك العملية و لكن هاديك راه بقا عملية غير مصادق عليها ؤ متتدخلش لدفتر الحسابات المفتوح، شكون غيصادق على هاد العملية، هما الحوفارا ديال البيتكوين لي تيتسماو المَايْنْرْزْMiners (عمال مناجم)
(nb: باش تولي ماينر خاص إكون عند واحد الجهاز ديال التعدين بالإظافة إلا شلا حوايج خرا، مغنهظر على هاد الموضوع حينتاش داك السوق شادينو اللوالا بأجهزة تعدين قوية دايرينو بيزنيس)
نفترضو أن الشخصين (أ) (ت) هما ماينرز، ملي تيكون واحد التحويل ديال العملة هاد الشخصين هادو تيتسابقو بيناتهم شكون الأول لي غيصادق ؤ يسجل داك التحويل فدفتر الحسابات المفتوح لي تيقوم بهاد العملية تياخد مقابل على خدمتو من عملة البيتكوين.

باش تكون اللول خاصك تدير جوج حوايج، الحاجة الأولى هي المصادقة على التحويل، فالمثال لي عطينا أنا كماينر غنشوف واش نيت الشخص (ب) عندو ديك 5 دراهم لي إصيفط للشخص (ج)، ؤ باش نعرف الرصيد ديال الشخص (ب) تنرجع لدفتر الحسابات المفتوح (داكشي علاش تيتسما مفتوح حينتاش أي واحد فالشبكة ممكن إدخل ليه) ؤ تنتبع شحال دخل من العملة للشخص ب ؤ شحال خرج، باش نعرف شحال باقي عندو، هادي ساهلة.
الحاجة الثانية هي نلقا واحد الكود خاص لي غيخليني نلصق هاد التحويل الجديد مع سلسلة التحويلات لي كاينة من قبل، باش نلقا داك المفتاح خاصني نستتمر مجهود حوسبي و زمني لأن داك الكود اعتباطي (هاد الطريقة تتشابه إلى حد ما بالطريقة لي تيخدمو بها برامج قرصنة شبكة الواي فاي؛ تيجربو أكواد بشكل اعتباطي حتى تيوصلو للكود الصحيح) بطبيعة الحال هاد الحوسبة تتقوم بها أجهزة خاصة(ACIS, AVALON, KNC...) ؤ فوقت يقدر ب 10 دقائق، (كانو الناس تيخدمو بالبيسيات مي داكشي مبقاش، ولات عندنا أجهزة أكثر سرعة فالتعدين، الخدمة لي إديرها داك الجهاز ف 10 دقائق غيخصك فالبيسي عام).
وخا نقولو أن الشخص (ت) هو لي سبق ؤ لقا داك الكود، إدن غيشارك الحل فالشبكة، غيتحققو الماينرز من الحل، ؤ غيتسجل داك التحويل (البلوك) فدفتر الحسابات المفتوح، ؤ غياخد (ت) مقابل من عملة البيتكوين على هاد الخدمة، هاد المقابل تيجيه من الرسوم، ماشي المتحركة، لي تتفرض على الشخص حول البيتكوين (الشخص (ب) فالمثال لي عطينا)

هنا تيبان ليك أن هاد المصادقة بحال شي قرعة، متنعرفوش إنا ماينر غيصادق على داك التحويل من بين أكثر من منيول ماينر فالعالم، حينتاش كون متدارتش هاد القضية كتنوض روينا فالبلوك تشين، أنا كماينر مثلا غنمشي نصادق على واحد التحويل دارو واحد صاحبي و لو أن داك صاحبي معندوش دوك الفلوس، بحال إلا شريتي بعتي واحد الدار ؤ قالت ليك البنكة أودي راه دوذ ليك المشتري الفلوس للكونط ملي تتجي للكونط تتلقاه تيصفر، أودي هاد ساتوشي ناكاموتي راه سوبرمان ديال بالصح.
هنا الماينر (أ) غيلقا أن داك التحويل صافي تسجل، غيمشي إقلب على تحويلات أخرى، لربمى تجي فيه القرعة إسجلو ؤ يربح عليه شويا من عملة البيتكوين، هادشي لي تيخلي البلوك تشين دائما محينة يعني دايما تتجدد.
معت واش طرحتو واحد السؤال مهم ولا لا، تنعرفو بلي بنك المغرب هو لي تيطبع الفلوس ؤ هادشي بطبيعة الحال داخلين فيه معايير بحال العرض و الطلب، قيمة الذهب و التظخم (هذا موضوع آخر إلا مهتمين تعرفو عليه خليو ليا كومونطير) و لكن هاد الحبس ديال البيتكوين شكون تيخرج الفلوس ؤ بأي معيار؟
ملي ساتوشي ناكاموتو دار اختارع هاد العجب قال ليهم أودي راه غنخرجو 21 منيول بيتكوينز، من 2009 تال سنة 2140 ميلادية إنشاء الله، البيتكوين تيشبه الذهب إلى حد بعيد!!
أخيرا و ليس آخرا، بالنسبة للسوبرمان ساتوشي ناكاموتو على حساب أول ظهور ليه فالسوشل ميديا كان كاتب بلي هو يباني، تزاد مع المسيرة ف 75، مي بعض المحللين لقاو بلي ساتوشي ماشي يباني، استنادا على مجموعة من الأدلة بحال اللغة ديالو، طريقة الكتابة، جمل كان كاتبها.. خلاتهم إشكو أنه بريطاني، ؤ شويا القائمة ديال الناس لي مشكوك فيهم أنهم ساتوشي ولات تتكبر: دوريان س نكاموتو، هال فيني، نيك زابو، كريg رايت....معرفينش بلي السوبرمان هو ساتوشي نكاموتو! مي شكون هوا السوبرمان؟ ...