الكايزن طريقك نحو السوبرمان

 من طرف السوبرمان
كل واحد فينا باغي إوصل لداكشي لي بغا، ؤ كل واحد فينا طموح إحقق مجموعة من الأهداف فالحياة ديالو (إيييه أ سيدي كلشي طموح، سو بلا ماتبقا تفلا علا راسك، تشوف الناس لي ضايرين بيك ؤ يتصحاب ليك راه ناقصهم طموح داكشي علاش ممطفرينوش، و لكن يا أسفاه مبقاتش فالطموح)
اليوم غنهضر على واحد الإستراتيجة سوبرمانية بامتياز، إمكن تستعملها فكاع مجالات الحياة ديالك، باش تحقق ذاتك و تولي سوبرمان. اليوم غنهضر على الكايزن Kaizen, اشناهو هاد الكايزن؟ ؤ كيفاش إمكن إفيدك؟
الكايزن هي استاراتيجية اقتصادية يبانية و اللي تتعني التحسن المستمر، هاد الطريقة نتاشرات فاليبان من بعد الحرب العالمية الثانية، مستوحات من ريادة الأعمال فميريكان و من طريقة عمل شركة السيارات اليبانية تويوتا toyota, الكايزن يركز على الوسيلة ماشي الغاية، الكايزن تيركز على العمل بذكاء ماشي بجهد، المبدأ الأول ديال الكايزن هو تختار حاجة وحدة فحياتك لي غتخليك تحقق داك التغيير لي بغيتي ؤ تركز عليها مزيان ؤ تحاول تنميها بشويية عليك حتى تيولي داك التغير بداية لتغير جديد إلى الأحسن بطبيعة الحال، مي هدا عليا أما ما بيزنيس مان ماوالو!! مع ذلك الكايزن تنفعك بزاف فحياتك الشخصية، ها كيفاش:

أولا حدد الاهداف لي باغي تحقق فحياتك، متعييش حياة فارغة لا ساس لاراس، مثلا بغيت نخدم مع الدولة، مع القطاع الخاص، ندير مشروع ديالي، نطور موهبتي، نقرا، نخرج على برا...
من بعد حدد هدف واحد و فقط واحد لي غيخلي الحياة ديالك تتحسن بشكل كبير، حينتاش لي بغا كلشي تيخلي كلشي، خاص 80% من وقتك تكون تدوزها فأعمال و لو بسيطة لي غتخليك تحقق الهذف ديالك، أسيدي بغيت ندير مشروع ديالي ميبرزطني تا حد، ييييه مزيان مزيان ؤ فين تدوز وقتك، غا مع العشران فالقهوة، إوا راه زبي لدرتي شي مشروع

من بعد خاصك تحلل هاد الهدف، واش نيت داكشي لي بغيتي، ؤ أشناهي العقبات لي تتمنعك تحقق داك الهدف، باش تبدا تحيد هاد العقبات وحدة وحدة ؤ بدا بالأسهل
الكايزن تقدر تستعملها باش تكتاسب عادة جيدة أو تتخلى على عادة سيئة، الدماغ ديالنا ملي متنحملوش نديرو شي حاجة لي تتخلينا نحسو بالملل و الإرهاق، تيعتبر ديك الحاجة تهديد، و هنا تيشعل البولا الحمرا لي عادة تتشعل ملي تنحسو بالخطر، هادي تتسمى fight or flight بمعنى الهروب أو المواجهة، ؤ دائما تنختارو اللول حينتاش دماغك تيخليك تعيش فكريا كاع داك الجهد، الإرهاق أو الملل لي غتجرب كون ختاريتي أنا تدير داك الفعل، فمثلا بدل ماتاخد الكتب ديال تراجع تتمشي لواحد الحاجة تتستمتع بها كثر و لي هي تفرج فالتلفزة أو تخرج مع العشران. و لكن مع الكايزن تدير واحد العمل صغير بزاف لي عندو علاقة بداكشي لي باغي تدير ؤ شويا بشويا حتى تتخلق عادة جديدة، مثلا بغيتي تقرا كتاب مي غير تتشوفو تتفشل ، الكايزن تتقول لك أو غير خود الكتاب و قرا غير الصفحة الأولى صافي ؤ حط الكتاب، من بعد قرا الصفحة الثانية، ؤ ماتجي فين تشوف تا تلقى راسك تتقرى شابيتر على كدها فكلسة وحدة، كيفاش، حينتاش قولبتي الدماغ ديالك ؤ مخلتيهش يشعل ضو الخطر.

الكايزن فيها ثلاث خطوات أساسية لا رابع لهن، الخطوة اللولة هي التخطيط و الإعداد، مثلا أنا بغيت ننجح فقرايتي ؤ باش ننجح حددت هدف بسيط لي هو كل يوم غنحاول نقرا داكشي لي درنا فالقسم ؤ ناخد ورقة ؤ نكتب فيها داكشي لي عقلت عليه، ثم مرحلة التطبيق، و اخيرا مرحلة المتابعة و التقييم بمعنى تتحبس ؤ تتشوف راسك واش الطريقة لها مفعول ثم تتحاول تخليها تكون مستدامة.

إقرأ أيضا :  التكفات : العادة الغير سرية