رالف لورن من الزلط للترفيحة

من طرف السوپرمان

 رالف روبن لايفشيتز، بدل كنيتو من بعد ل لورن، من بين الناس لي نطلقو من الصفر ؤ بناو حياتحم على ساس صحيح، خونا أمريكي تزاد ف 1939، دار ريادة الأعمال فالجامعة ساعة مابان ليه والو فداكشي ؤ شاف بلي البيزنيس هو تدير شي حاجة ديالك، لربما هذا هو السر، هاد السعات إلا كملتي قرايتك عرف راسك ضايع، سبحان الله كاع الناس لي ولاو لاباس خرجو من الجامعة عندك زوكربرك، بيل كييتس، ستيف جوبس، مايكل ديل، و اللائحة طويلة. 
لورن خدم مع الدولة فلارمي، مي لقا بلي الوظيفة غتنجيه من الفقر ولكن غتحرمو من الغنى، إذن الحل هو تدير مشروع ديال و لكن كيفاش تدير مشروع و نتا معندك تجربة، السيد فكر بعيد و خدم فالمبيعات ف بروكس برادرز و تماك كانت البداية ديال الماركة العالمية رالف لورن المعروفة من بعد ب بولو polo ، كانت عندو ديك الساعات 28 إييييه 28 ، ف 1967 دار فرع ف بروكس برادرز سماه على سميتو رالف لورن ؤ كانو تيصوبو ربطات العنق الكرفتات فقط ؤ كان هو لي تيتكلف إوصل السلعة ديالو للمحلات، فالأول منجحش ليه داكشي ؤ السيد متيربح والو من غير تمارة، كان تيعشك الرياضة و خاصة رياضة البولو، لي هي رياضة قديمة تيكونو فيها جوج فرق راكبين فوق الأحصنة.

من بعد ف 79 السلعة ديالو ولات تتعرف بالجودة و الأناقة ديالها و لي ساهم فداكشي هو الفلم العالمي the great gatsby حينتاش الشركة ديال رالف لورن هيا لي تكلفت بملابس الممثلين، ف 71 دخلو فصناعة حوايج العيالات و فنفس العام حلت الشركة أول محل خاص بها، أول محل تيحلو شي مصمم أمريكي، رالف لورن، من بعد بدات الشركة فالتوسع ولات تتصنع حوايج الرجال و العطور و بزاف ديال الممثلين العالميين لبسو تيشورتات ديال رالف لورن مما زاد من نجاح منتوجات الشركة، ف 1999 شرا لورن الماركة الكندية كلوب موناكو ب 52.200.000$ .

رالف لورن هاد الشخص لي بدا من الصفر ولات عندو أراضي شاسعة خاصة فكولورادو، مطاعم فباريس، نيويورك، و طوكيو. شي 100 سيارة و أغلبها سيارات نادرة و لا ثمن لها بحال فيراري 1962، بوكاتي 1937، بورش 997...جوج مرات ربح أحسن معرض للسيارات،
و كأغلب المرفحين فميركان، ماشي بحال هاد ولاد الحرام عندنا، تيقدم ملايين الدولارات للأعمال الخيرية. و فالرصيد ديالو الآن 7.1 بليون دولار
من مقولاته "أنا لا أصمم الملابس بل أصمم الأحلام"


Photos taken from
Yahoo News
peluqueriacanovas