وارن إدوارد بافيت الملياردير العصامي، فعمرو دبا 88 عام .. تزاد ف 1930 فنبراسكا ميريكان..من أشهر و أنجح المستثمرين فميريكان بل فالعالم بأسره..ثالث أغنى رجل في العالم من بعد جيف بيزوس ؤ بيل غييتس بما يقدر ب 86300000 دولار أمريكي (86.3 بليون دولار) ..
الساط عندو الإستثمار تيجري فالدم ملي كان باقي صغيير، هادشي لي خلاه إدير البيزنيس فالجامعة، دائما تحديد الأهداف و العمل لتحقيقها هي الخلطة السحرية فهادشي كامل، ماشي بحال بنادم عندنا تالف غير تيدردك..
مي أشنو خلا هاد الشخص إولي ناجح بحال هكا؟، واش كاين شي سر؟ واش هاد الثروة ورثها من باه؟.؟؟
كيما قلت وارن بافيت رجل عصامي و محب لريادة الأعمال و لأي حاجة عندها علاقة بالأرقاو ؤ الإحصائيات منذ الصغر..لي خلاه إكون هكا هي أولا التنشئة الإجتماعية من طرف والديه لي خلاتو إكون دائما طموح، ذكي و مبدع..كان عندو واحد الكتاب عزيز عليه ؤ كبر معاه "ألف طريقة لتحصيل ألف دولار لكاتبة ف س ميانكر" .. فميركان عندهم فالثانوية كل تلميذ تيدير واحد الكتاب سنوي yearbook تيسجل فيه داكشي لي تيدوزو فليكول، نفس الكتاب كون كان عندنا غنكتبو فيه ديما وداد، خالد+اسماء=الحب...وارن بافيت كان كاتب فيه"عاشق للرياضيات، وسيط فالبورصة مستقبلا" الساط عندو إيمان قوي بالفكرة لدرجة أنه قالهم واحد النهار"إلا موليتش ميليونير قبل منوصل لتلاثين عام غنتلاح من أعلى بناية فؤوماها".. دخل البيزنيس ملي كانت عندو خمس سنين، كنتي نت ملي كانت عندك خمسنين تتخرى ؤ تتعجن الخرية بيديك الله علا حب التملك؛ السيد باع المسكة من دار لدار، الجرائد، المونادا، الgلية و كاوكاو فالتيرانات...ملي كانت عندو 11 عام كان جمع شي بركة ؤ شرا بها ثلاث أسهم مالية فسوق البورصة ؤ بطبيعة الحال ربح فيها بعد واحد المدة، لكن كان من الممكن إربح كثر كون متسرعش فالبيع، من هاد التجربة تعلم بزاف ؤ كانت بداية لطريقه الطويل و الشاق للبليونيرية.
ملي كانت عندو 13 عام كان تيبيع الجرائد و المجلات بالبيكالا ديالو حتى ولا تيشد 175 دولار فالسيمانة يعني كثر من داكشي لي تيشدو الأساتذة ديالو
14 عام شرا صبعطاش هكتار ديال الأرض ب 1200 دولار ، ؤ خدم فيها فلاح تيتقاسو الأرباح، فنفس لاج دار شركة تيشر ألعاب البينبول pinball قدام ؤ تيديرهم فمحلات الحلاقة ؤ تيتقاسم الأرباح مع الحلاق، ملي شد الباك باع الشركة ديالو ب 1200 دولار، السيد شد الباك ؤ كان فالرصيد ديالو 5000 دولار ما مقداره 55000 دولار ديال دبا.
بافيت مكانش باغي إمشي للجامعة، مي الواليد ديالو مخلاهش إخرج من القراية،قرا فجامعة بينسيلفينيا من بعدها نيبراسكا من بعد ها مدرسة ريادة الأعمال فكولومبيا، تماك تلاقا بواحد الشخص تأثر بيه بزاف بينجامين كراهام لي كان ذكتور فديك الجامعة، منو تعلم بزاف على الإستثمار خاصة الإستثمار القيمة value investing .. أبار بينجامين كراهام وارن صدق تيعرف كثر من الأساتذة لي تيقريوه، ؤ فعلا راه ميمكنش شي واحد تلات به ليام تى ولا موضف حقير مع الدولة ؤ تتسنى منو إعلمك كيفية النجاح فالحياة!!!
انه وارن بافيت ياسادة الرئيس التنفيدي ديال بوركشير هاثاويي Berkshire Hathaway, ؤ لي هي شركة قابضة متعددة الجنسية، تمتلك أكثر من 60 شركة، القيمة ديالها مايقدر ب 711.932 بليون دولار ؤ خدام فيها حوالي 377000 شخص.
ؤ كأغلب البيليونيرات فأمريكا بافيت هو شخص محب للخير ؤ بزاف كاع؛ السيد تعهد بلي غيعطي 99% من الثروة ديالو للأعمال الخيرية بالخصوص من خلال مؤسسة بيل و ميليندا الخيرية، المؤسسة لي دار بيل غييتس و الزوجة ديالو، لحد الآن عطا لنفس المؤسسة 35 بليون دولار، ؤ ف 2010 دارو واحد المبادرة سماوها "تعهد إعطاء" Giving Pledge لي تيطلبو فيه من البيليونيرز باش إتبرعو على الأقل بنص الثروة ديالهم لأعمال خيرية..
image taken from : appleinsider
