المكي الضخيرات: رجل خارق أم أكبر مخربق

المكي الترابي أو مكي الصخيرات كما يلقبه الكثير، الرجل الخارق كما يلقب نفسه. تعرفنا على هاد الشخص الاقرع، دو بنية جسدية ضخمة و عينيه الجاحضتين، فسنة 2007 ملي كان ليه أول خروج إعلامي، خونا يدعي أنه تيعالج مختلف الأمراض بحال المسيح بل يقدر إصيفط الطاقة ديالو لأي واحد وخا إكون بعيد بحال دراكونبول زيد، شيئ محير فعلا و لكن الشيئ الأكثر عجبا هو الأعداد الهائلة ديال الناس لي تتزور هاد السيد، من مختلف فئات المجتمع ها لي قاريين، هالي مقاريينش، هالغني و المزلوط بل و حتى ناس من أوروبا تيحجو عند المكي طامعين فالشفاء ؤ تيبوسو رأسه الأقرع بكل شغف و حب. دبا السؤال لي تيطرح راسو هو واش نيت المكي رجل خارق ولا مخربق، واش إمكن زعما تعالج الناس بديك الطريقة، آش تيقول العلم فداكشي؟؟؟؟؟
أولا كإشارة باش الناس إجو لعندك من كل فج عميق باش إزوروك راك تستحق لقب الرجل الخارق أو السوبرمان، مي أشنو لي تيخلي الناس إمشو عند المكي، كاينين جوج أسباب لا ثالث لهما، هاد الأسباب اقترحها علم النفس ماشي أنا
أولا، الثقة العمياء و الإيمان الراسخ ديال المكي فالقدرات ديالو خلات الناس تا هما إثيقو فيه بشكل مطلق، راه ساهل تقنع اي حد بواحد المسألة و لو تكون غلط يكفي فقط أنك نتا مقتنع بشكل مطلق، ؤ هادشي باين تا فطريقة الحديث ديال المكي، و الأفعال ديالو كذللك.
ثانيا، اليأس، اغلب الناس لي تيزورو المكي، ناس تيحسو باليأس و فقدان الأمل، ها لي مريض بالسيدا ها لي مريض بالسرطان...في حين أن الطب معطاش الفعالية ديالو، تيلتجأ الشخص لأي شيئ آخر و لو تيبان تخربيق غير باش إتشفا، شحال من واحد تضرو غير المعدة مثلا، تيوصل واحد المستوى كون قلتي ليه راه الخرية سخونة تصلاح للمعدة كون كلاها، ؤ تيبقا إجرب أي حاجة سمع بيها بكل نية على أمل الشفاء.
مي واش نيت ممكن أن المكي رجل خارق ؤ تيعالج الناس كيفما شحال من واحد تشفا على يد المكي¡¡¡¡¿¿¿¿
المكي يدعي أنه تيعالج بالطاقة energy healing. هاد العلاج الطاقي مبني على مبادئ علمية؛ كانو قراونا فالليسي بلي أي جسم فالعالم يتكون من ذرات، أي جسم بمعنى حتى الأجسام الصلبة بحالنا حنا، ذرة وحدة تتكون من البروتون و النيترون فالوسط تيدور أو تيفيبري vibrate عليهم الالكترون vibration. بمعنى راه أي واحد فينا تيفيبري؛ عندو هاد الفايبرايشن ؤ لي هي موجة الطاقة الشخصية personal energy frequency . ؤ لي تيتحكم فهاد pef هو مجموع الأفكار، الأفعال و التجارب لي دوزتي فحياتك. إنها طاقة تحيط بل و تنتشر في كل خلايا جسمك.
ملي تنقولو بلي الشخص عندو ردود فعل إيجابية good vibes هدا يعني أن داك الشخص عندو pef طالع، إلى درجة أنه تيأثر فالناس لي دايرين بيه. تسنا أ الدمدومة نشرح ليك بالخشيبات كيما ديما، ناخدو أي محيط مثلا عندكم فالدار، فالقسم، أولا مع العشران تيكون داك الشخص لي تيخليكم ناشطين ؤ راشقة ليكم ؤ ملي متيكونش تتبان بلاسطو خاوية ؤ كاينين الناس لي العكس.
كذلك الأماكن عندها ال pef ديالها واش كيما تتحس فبيتك هو كيما تتحس فالقسم، فالعمل أو فالشاطئ مثلا. بطبيعة الحال لا. مي معمرك سولتي راسك علاش، إنها ال pef صديقي صديقتي.
باش الواحد إستافد من العلاج الطاقي خاص أولا يامن به، كاينين أنواع متعددة ديال العلاج الطاقي مي ثلاثة هما لي معروفين بزاف.
 عندك الرييكي Reiki ؤ لي تيمكنك وصيفط الطاقة لشي واحد ولو أنه بعيد عليك، ؤ هادشي باقي غنشرحو فالقادم من الأيام حينتاش عندو علاقة بقانون الجذب، 

النوع الثاني هو أكوبانكتشور Acupuncture ؤ لي هو يباني الأصل تتستعمل فيه الإبر و كذلك الأيدي. 

 و النوع الثالث سميتو ريفليكسولوجي Reflexology ؤ هاذ النوع تيخدم على تحرير الطاقة لي كاينة فالشخص عن طريق نقط طاقية فالرجلين، الليدين و الوجه .

ملي شفتي مكي الصخيرات هاز إديه فالسما بحال دراكونبول زيد ؤ تتشوف الناس يقبلون رأسه الأقرع بكل شغف و حب، بل و تتشوف أنه تيدوي تا الناس فأوروبا و أمريكا، تتقول مع راسك وايني صنطيحة عندو، ؤ هاد الهيماج دايرين فيه راسهم، واش داكشي لي خاصو إتقال ولا أنتا لي هيماج، ياك مغتكون من رواد مكي الصخيرات أو شي حد بحالو شي نهار، واش كاينة هاد الطاقة نيت، واش كاع داكشي لي تيقولو 'العلماء' صحيح، ياك ما هاد العالم لي اكتاشف هاد الطاقة هو مكي نيويورك ؟؟؟؟

source of images:
1st image : hespress
2nd image : spirit
3nd image : pastemagazine
4th image : epainassist